ممبئی: بھارتیہ جنتا پارٹی کی مخلوط حکومت کے گزشتہ ڈھائی سال کے دوران منشیات کے سیاہ کاروبار میں بڑے پیمانے پر اضافہ ہوا ہے۔ نوجوان نسل کو نشے کی طرف دھکیلا جا رہا ہے۔ اربوں روپے کی منشیات کا کاروبار کھلے عام جاری ہے اور پنجاب کی طرح مہاراشٹر کو بھی ’اڑتا مہاراشٹر‘بنا دیا گیا ہے۔ کانگریس اور مہاوکاس اگھاڑی کی حکومت آنے کے بعد ہم مہاراشٹر کو منشیات کے چنگل سے آزاد کرانے کے لیے سخت قانون بنائیں گے اور کسی کو بھی’اڑتا مہاراشٹرا‘ بنانے کی اجازت نہیں دیں گے۔ یہ باتیں رکن پارلیمنٹ اور آل انڈیا کانگریس کمیٹی کے جنرل سکریٹری راجیو شکلا نے دی ہے۔ممبئی کانگریس کے دفتر میں منعقدہ ایک پریس کانفرنس سے خطاب کرتے ہوئے کانگریس کے سینئر لیڈر راجیو شکلا نے کہا کہ بھارتیہ جنتا پارٹی نے مہاراشٹر میں مہا وکاس اگھاڑی حکومت کو گرا کر سبوتاژ کرکے حکومت بنائی ہے، یہ عوام کے ساتھ دھوکہ ہے۔ مخلوط حکومت نے کرپشن کے کئی ریکارڈ بنائے اور تقریباً 2 لاکھ کروڑ روپے کا غبن کیا، لیکن عوام کو کچھ نہیں ملا۔ بی جے پی کی قیادت والی حکومت نے کرپشن کے معاملے میں چھترپتی شیواجی مہاراج کو بھی نہیں بخشا۔ شیواجی مہاراج کی مورتی میں بھی کرپشن ہوئی ہے۔ اس بدعنوانی کی وجہ سے یہ مجسمہ گرا۔ خود وزیر اعظم نریندر مودی نے اجیت پوار پر 70 ہزار کروڑ روپے کی بدعنوانی کا الزام لگایا تھا لیکن دو دن بعد انہیں بھارتیہ جنتا پارٹی کی حکومت میں شامل کرکے وزیر خزانہ بنا دیا گیا۔ اب اس 70 ہزار کروڑ روپے کا کیا ہوا؟ ایسا سوال شری شکلا نے بھی کیا ہے۔بی جے پی کی قیادت والی حکومت نے کسانوں کو کوئی مدد فراہم نہیں کی۔ سویا بین کی پیداوار میں مہاراشٹر ملک میں دوسرے نمبر پر ہے، لیکن یہاں کے کسانوں کو فصل کی مناسب قیمت بھی نہیں مل رہی ہے۔ ایک کوئنٹل سویا بین پیدا کرنے پر 4000 روپے لاگت آتی ہے، لیکن مارکیٹ میں اتنی قیمت بھی دستیاب نہیں ہے۔ مہاوکاس اگھاڑی کی حکومت آنے کے بعد سویا بین کو 7 ہزار روپے فی کوئنٹل کی قیمت دی جائے گی۔راجیو شکلا نے کہا کہ کانگریس پارٹی نے ہمیشہ اپنے وعدوں کی پاسداری کی ہے۔ یو پی اے حکومت نے کسانوں کے 71 ہزار کروڑ روپے کے قرضے معاف کر دیے تھے۔ ملک میں منریگا اور حق اطلاعات جیسے قانون لائے گئے۔ آج بھی کرناٹک، تلنگانہ اور ہماچل پردیش میں کانگریس کی طرف سے دی گئی ضمانتوں پر عمل ہو رہا ہے۔اس پریس کانفرنس میں کانگریس کے قومی ترجمان سریندر راجپوت، ممبئی کانگریس کے چیف ترجمان یووراج موہتے، ممبئی کانگریس کے خزانچی سندیپ شکلا اور کانگریس کے ترجمان نظام الدین راعین سمیت دیگر موجود تھے۔
