ممبئی:پچھلے 9 سالوں میں مودی حکومت نے ملک کی عوام کا پیسہ اپنے دوستوں کی جیبوں میں ڈالا ہے۔ ملک کی تمام بڑی سرکاری صنعتیں اور ٹھیکے صرف اڈانی کو دیئے گئے ہیں۔ فرضی کمپنیوں کے ذریعے اڈانی گروپ میں 20 ہزار کروڑ روپے کی سرمایہ کاری کی گئی ہے۔ یہ پیسہ کہاں سے آیا؟ یہی سوال کانگریس کے سابق صدر راہل گاندھی نے بھی اٹھایا ہے۔ مہاراشٹر پردیش کانگریس کمیٹی کے صدر نانا پٹولے نے چیلنج کیا ہے اور کہا ہے کہ وزیر اعظم نریندر مودی اس کی تحقیقات کرنے کی ہمت دکھائیں۔ریاستی کانگریس نے مودی اڈانی کے بدعنوان اتحاد کو بے نقاب کرنے کے لیے جمعہ کو ریاست کے تمام اضلاع میں پریس کانفرنس کی۔ ریاستی صدر نانا پٹولے نے تھانے میں پریس کانفرنس سے خطاب کیا۔ کانگریس لیجسلیچر پارٹی کے لیڈر بالاصاحب تھورات نے احمد نگر میں پریس کانفرنس کی، سابق وزیر اعلی اشوک چوہان نے پربھنی میں، پرتھوی راج چوہان نے پونے میں، قانون ساز کونسل میں کانگریس کے گروپ لیڈر ستیج پاٹل نے سانگلی میں پریس کانفرنس کی۔پالگھرمیں ریاستی ورکنگ صدر نسیم خان، ناسک میں ایم ایل اے کنال پاٹل، دھاراشیو اور ایوت محل میں بسوراج پاٹل، پمپری چنچوڑ میں شیواجی راؤ موگھے اورچندرپور میں ایم ایل اے پرنیتی شندے اور ریاستی کانگریس کے چیف ترجمان اتل لونڈھے نے پریس کانفرنس کی۔اس کے علاوہ سابق وزراء اور دیگر لیڈروں نے اپنے اپنے اضلاع میں پریس کانفرنسیں کیں۔تھانے میں پریس کانفرنس سے خطاب کرتے ہوئے ریاستی صدر ناناپٹولے نے کہا کہ نیرو مودی، للت مودی، وجے مالیا جیسے چور اور لٹیرے ملک کے عوام کا پیسہ چوری کرکے بیرون ملک فرار ہوگئے۔ راہل گاندھی کو سورت کی عدالت نے نیرو مودی اور للت مودی کو چور کہنے پر ہتک عزت کا مجرم ٹھہرایا اور اگلے ہی دن بی جے پی حکومت نے ان کی پارلیمنٹ کی رکنیت منسوخ کردیا۔ یہ سب بی جے پی کے اشارے پر کیا گیا ہے۔ پٹولے نے کہا کہ راہل گاندھی نے مودی-اڈانی کے بدعنوان اتحاد کو بے نقاب کیا ہے، ایسے میں مودی حکومت کے خلاف آواز اٹھانے پر راہل گاندھی کے خلاف یہ کارروائی کی گئی ہے۔احمد نگر میں میڈیا سے بات کرتے ہوئے کانگریس لیجسلیچر پارٹی کے لیڈر بالاصاحب تھورات نے کہا کہ ملک کی صورتحال تشویشناک ہے، سوال اٹھ رہے ہیں کہ ملک میں جمہوریت ہے یا نہیں۔ ہمارے لیڈر راہل گاندھی کو پارلیمنٹ میں بولنے کی اجازت نہیں ہے، جمہوریت میں سب کو اظہار رائے کی آزادی ہے لیکن راہل گاندھی کی آواز کو دبایا جا رہا ہے۔ جمہوریت میں اختلافات ہوتے ہیں۔ یہ ایک صحت مند جمہوریت کی نشانی ہے، لیکن یہ بی جے پی کو قبول نہیں ہے۔ بی جے پی ملک کی جمہوریت کو تباہ کرنے کی تمام کوششیں کر رہی ہے۔راہل گاندھی کا سیدھا سوال ہے کہ اڈانی گروپ میں 20 ہزار کروڑ روپے کہاں سے آئے؟ اس الزام کی تحقیقات ہونی چاہیے۔ لیکن بی جے پی حکومت نے اڈانی گھوٹالے کی تحقیقات کرانے کے بجائے راہل گاندھی کی لوک سبھا کی رکنیت منسوخ کردی۔ کانگریس پارٹی ریاست بھر میں مختلف تحریکوں کے ذریعے بی جے پی حکومت کے اس آمرانہ فیصلے کے بارے میں لوگوں کو آگاہ کر رہی ہے۔ اس کے تحت جمعہ کو تمام اضلاع میں ایک پریس کانفرنس کا انعقاد کیا گیا، اب بی جے پی حکومت کی سرگرمیوں سے تعلقہ سطح پر بھی جانکاری دی جائے گی۔سابق وزیراعلیٰ پرتھوی راج چوہان نے پونے میں خطاب کرتے ہوئے کہا کہ حکومت سے سوال کرنا اپوزیشن کا بنیادی فرض ہے۔ تاہم، پارلیمنٹ میں کانگریس کے لیڈروں کو ایسا کرنے سے روک دیا گیا۔ اس لیے ہم میڈیا کی مدد سے معلومات دینے کی کوشش کر رہے ہیں۔ انہوں نے کہا کہ ہنڈن برگ کی رپورٹ میں الزام لگایا گیا ہے کہ گوتم اڈانی ایک مہاٹھگ ہیں۔ یہ بھی الزام ہے کہ اڈانی نے غلط معلومات دے کر اور حکومت پر دباؤ ڈال کر اپنے گروپ کو بڑھایا۔ راہل گاندھی نے پارلیمنٹ میں یہ سوال اٹھایا۔ آخر گوتم اڈانی اور پی ایم مودی کے درمیان کیا رشتہ ہے؟ راہل گاندھی نے یہ بھی پوچھا کہ بے نامی کمپنیوں کے ذریعے اڈانی گروپ میں 20,000 کروڑ روپے کس نے لگائے ہیں۔ لیکن بی جے پی حکومت نے پارلیمنٹ میں راہل گاندھی کی تقریر کو حذف کر دیا۔ اس کے بعد پرانے کیس کا کیس نکالا گیا اور ہمارے لیڈر کو سزا دی گئی۔ سزا کے فورا بعد راہل گاندھی کی رکنیت بھی منسوخ کر دی گئی۔ پرتھوی راج چوہان نے یہ بھی کہا کہ یہ ایک من مانی کارروائی ہے، جس کے خلاف کانگریس پارٹی عوام کی عدالت میں جائے گی اور حکومت کے خلاف آواز اٹھائے گی۔
